Stephanus Marais en sy swaer Hendrik Jacobus Henning (Soon) (b9.c3.d3.), die broer van sy vrou, het saam twee plase besit, naamlik Hammanskraal en Putfontein. Hulle het met beeste geboer. Hammanskraal was gebruik vir winterweiding en Putfontein vir somerweiding. Stephanus Marais en sy vrou het vyftien kinders gehad, waarvan vyf vroeg dood is. Die grond waarop die skool by Putfontein gebou was, is deur Stephanus Marais en sy swaer Soon Henning geskenk. Die skool was bekend as die Henning Marais Skool. Mettertyd het Stephanus Marais en sy vrou na Kromkuil in die Winterveld verhuis, waar albei gedurende die 1918/19 griepepidemie oorlede is.