Karl Olson Nordtun

Han vart stemnd av Bent Mikkelson Sandbech i 1677 "for nogen grove och utilbørlige skjellsord om ham i hans fraværelse da arveskiftet skiede i høst paa Mehuus". Karl sa "at han iche ved med sin Sandz eller Sambuittighed at haffue talt eller Sagt noget paa den Dannemand Bent Michelsen." Karl hadde vore "overstadig drukken" og måtte bøta 1 rdl.

Karl vart i 1700 stemnd av Casper Warner i Sønstabøvågen forid han "nest afvigte Nytaars aften paa Mehus skielt ham adskilligt paa hans ære og meere u-beqvemsord." Mellom vitna var presten Hans Rafnsberg. Han kunne vitna at han høyrde Karl "skielte Casper Syndstabøvaagen for en kieltrings unge og Raabte paa sin Knif". Då presten var på Mehus nyårsaftan, så var det fordi han, etter gamal skikk, kom nordetter nyårsaftan og heldt gudsteneste i Gåslandskyrkja, og så overnatta han i Sønstabøvågen og hadde gudsteneste nyårsdag òg. Han har då vorte beden til gjestebods på Mehus, og dei har truleg då feira hundreårsskiftet. Då nokre vitner ikkje møtte, vart saka utsett, men kom ikkje opp att. Truleg vart dei forlikte før nytt ting vart halde.

Karl var velstandsmann og i buet etter han er nemnt 13 riksdalar i reide pengar, sju kyr, tre kviger, ein stut, ein kalv, eitt føl, tre smaler, to laksnøter, to sjøbuer, eit naust, ei glasbu "opbingt paa øde Toft". Netto i buet var 103 riksdalar.