Daniël Francois du Toit

Daniël Francois (Dokter) du Toit (Naauwbepaald, deesdae Valencia, Daljosafat, die Paarl, 21 November 1853 - die Paarl, 2 April 1918) was 'n stigterslid van die Genootskap van Regte Afrikaners en 'n drukker.

Du Toit se geboorteplaas was 'n gedeelte van die oorspronklike plaas Kleinbosch, wat Simon van der Stel toegeken het aan Du Toit se voorvader en die stamvader van die Du Toit's in Suid-Afrika, François du Toit.

Hy het bekendgestaan onder die bynaam "Dokter" omdat hy altyd 'n medisynetassie by hom gedra het. As stigterslid van die G.R.A. was hy ook 'n groot kampvegter vir die erkenning van Afrikaans. Hy was behulpsaam met die drukpers in die huis van Gideon Malherbe in die Paarl in 1875. Nadat hy drukwerk in die Vrystaat onderneem het, het hy na die Paarl teruggekeer en word hy bestuurder van die drukkery en uitgewersfirma Du Toit & Kie van 1878 tot 1897, toe hy weer op Daljosafat gaan boer. Omstreeks 1905 dien hy saam met manne soos genl. J.B.M. Hertzog en ds. Willem Postma in Bloemfontein in die bestuur van die Afrikaanse Taalgenootskap.

Hy was die vader van prof. D.F. du Toit van Stellenbosch en dr. P.J. du Toit, opvolger van sir Arnold Theiler op Onderstepoort.