Vladimir Petroff Steyn, b1c8d13e6f8g1h4

Oud-sekretaris van Verdediging oorlede Mnr. Vladimir Steyn Eie Korrespondent FRANSCHHOEK. Mnr. Vladimir Steyn, voormalige Sekretaris van Verdediging en voorsitter van Satoer, is Vrydagnag in die ouderdom van 78 jaar in 'n Paarlse hospitaal oorlede. Hy word vandag om 11 vm. uit die NG kerk hier begrawe. Mnr. Steyn en sy vrou, Millicent, het die laaste paar jaar op die dorp gewoon naby hul dogter, die skryfster Petrovna Metelerkamp. Hulle het nog 'n dogter, Helga Steyn, 'n bourekenaar van Seepunt. Mnr. Steyn was onder meer hoof- volkswelsynbeampte van die Departement van Volkswelsyn. Hy was verantwoordelik vir die stigting van werkkolonies op Kraaifontein en Faure, sowel as die veiligheidshawens Bonnytown en Tenterden vir kinders. As Sekretaris van Verdediging het mnr. Steyn die eerste kontrakte vir die aankoop van etlike militêre vliegtuie onderteken onder meer die Mirages en Alouette-helikopters. Ná sy uittrede het die pos van Sekretaris van Verdediging verval. Hy was ook 'n ervare grootwildjagter. Mnr. Steyn het sy uitsonderlike name Vladimir Petroff te danke aan die waaghalsige ontsnapping van sy pa, wyle mnr. Willie Steyn, ten tyde van die Anglo-Boereoorlog. Willie Steyn en vier makkers het in die hawe van Ceylon van 'n Britse skip ontsnap en op 'n Russiese vlootskip skuiling gevind. Die Russiese vlootoffisier Wladimir Petrowitsj Kissimof, het Steyn-hulle help ontsnap.

Source: Die Burger 26 November 1991

http://152.111.1.87/argief/berigte/dieburger/1991/11/26/16/8.html