Erik Andresson Fet

«...alle the knaber ther inde och sædescwenne...» av Jo Rune Ugulen:

SAK 31: 15. juni 1320: Gjelds- og pantebrev frå Eirik Andresson på Fet. Han har motteke 65 laupar frå abbed Einar i Munkeliv, som skal betalast attende innan 3. august, 5 i huder og resten i smør. I motsett fall skal abbeden ha 3 mmb i Vindedal (Lær 41) og fritt rå for bortbygslinga til gjelda er betalt.149 Rimelegvis er Eirik Andresson busett på garden Fet i Hafslo i Sogn (Haf 19), ein gard som seinare i mellomalderen og inn i tidleg nytid er eit adelssete. Omlag 150 år etter dette brevet, møter vi dessutan ein annan Erik Andersson på Fet. Han var riddar og gift med ei Margrete Ivarsdotter.150 Dette kan vera ein indikasjon på at ein også bør rekna den eldre Eirik Andresson til aristokratiet. Kva Eirik Andresson skulle bruka omlag eitt tonn smør til,151 kan ein også spørja seg om. Det har neppe vore tenkt til privat bruk. Snarare er det rimeleg å rekna med at Eirik Andresson har vore ombodsmann i Sogn for ein eller annan institusjon, og lånte smøret frå abbeden i Munkeliv for til dømes å betala landskyld utan at han trong frakta betalingsmidla heile vegen frå Sogn i første omgang.

150. Abs., Om Norgis Rige, s. 101: «anno 1471 bode en anden ridder paa Fid, hed her Erich Andersen, hans frue fru Margrete Iffuersdotter.».