Francois Johannes du Toit, e2f4g1h1

Lewensskets: Oom Frank du Toit

(Soos op portret van Frank du Toit in die Frank du Toit Ouetehuis, Prieska)

Frans Johannes Stefanus du Toit is op 29 Junie 1877 op Villiersdorp gebore. Op nege maande ouderdom het sy vader hom ontval. Hierna verhuis sy moeder na die Noordweste en vestig haar in die distrik Marydale, waar sy weer trou met Casper Mareë en na sy dood met Jacob Mareë.

Vir sy skoolopleiding gaan jong Frank na Blouvlei, Wellington, waar hy as skrander leerling presteer. In sy getuigskrif van die skoolhoof aan hom, skryf die hoof: “Alles wat die jonge Heer du Toit aanpak, sal hy ‘n groot sukses van maak”.

Terug op die plaas, het sy stiefvader sy buitengewone pligsgetrouheid, daadkrag en gesonde besigheidsvernuf opgemerk. Hy het hom gehelp om die plaas Smidwater, in die Prieska distrik te koop. Van hierdie beskeie begin het hy steeds uitgebrei totdat hy op een stadium die grootste enkel marino-boer in die Republiek was. Hierdie groot inkomstes het hy nie vir eie gerief aangewend nie, maar veel eerder tot voordeel van sy gemeenskap en medemens.

‘n Bewys hiervan is sy netjiese en goed-versorgde plase en talle groot skenkings uit sy boedel. Vir die Sendingkerke van Kenhardt, Marydale en Prieska laat hy ‘n groot plaas na. Hy bemaak ‘n plaas aan die plaaslike hospital, maar diè is later oorgedra vir die bou van die “Frank du Toit Ouetehuis”. Hy stel studiebeurse tot die beskikking van skrander maar behoeftige leerlinge, wat hulle in staat gestel het om hulle te bekwaam vir onderwysers, predikante en geneeshere.

Uit sy huwelik met Kate, oudste dogter van ds. J.H. van Wyk, van Murraysburg is drie seuns en twee dogters gebore. Na haar dood trou hy met mej. G. du Toit, onderwyseres van Prieska. Sy het hom groot steun verleen in sy uitgestrekte boerdery-bedrywighede en hom trou versorg tot sy dood op 4 Julie 1963.