Friðgerður Friðriksdóttir

Friðgerður Friðriksdóttir fæddist 9. október 1917 að Látrum í Aðalvík. Hún lést 21. janúar síðastliðinn. Foreldrar hennar voru hjónin Mikkalína Þorsteinsdóttir og Friðrik Geirmundsson. Mikkalína og Friðrik eignuðust tíu börn og eru þrjú þeirra enn á lífi.

Friðgerður giftist hinn 14. október 1939 Erlendi Einarssyni, f. 2.9. 1914, d. 12.12. 2003, syni hjónanna Ingibjargar Guðjónsdóttur og Einars Dagfinnssonar. Friðgerður og Erlendur eignuðust þrjú börn, Einar f. 2.12. 1939, maki Elín Margrét Höskuldsdóttir og eiga þau fjögur börn; Ardísi, f. 30.11. 1943, maki Sigurður Hermannsson en hann lést 1988 og eiga þau þrjú börn; og Ingibjörgu, f. 3.9. 1947, maki Franklín Brynjólfsson en þau slitu samvistum og eiga þau þrjú börn.

Friðgerður vann til marga ára í Kassagerð Reykjavíkur við ræstingar.

Útför Friðgerðar verður frá Fríkirkjunni í dag og hefst athöfnin klukkan 11.

Okkur systurnar langar í nokkrum orðum að minnast Fríðu ömmu sem nú er látin. Fyrstu minningar okkar eru tengdar því hversu gaman var að heimsækja ömmu og afa þegar við vorum litlar. Oftar en ekki voru þá kræsingar á borðum og sterkar minningar eru tengdar því hversu notalegt var að sitja með þeim og tala um daginn og veginn. Amma fylgdist ætíð vel með því sem við vorum að aðhafast hverju sinni án þess þó að hafa miklar skoðanir á hlutunum. Hún hafði ákaflega gaman af því að spila við okkur barnabörnin og oft var í heimsóknum til hennar sest niður og gripið í kana sem átti miklum vinsældum að fagna. Ófáar voru einnig sumarbústaðaferðirnar sem farnar voru og var þá jafnan margt um manninn og mikið fjör. Amma var mikil hannyrðakona og gat stolt sýnt okkur myndir og púða sem hún saumaði. Hún prjónaði einnig mikið og var gott fyrir kaldar tær og fingur að eiga hana að.

Amma og afi ferðuðust mikið, bæði innan og utanlands. Þau sóttu gömlu dansana reglulega meðan heilsan leyfði og fóru í daglegar gönguferðir. Amma og afi áttu því láni að fagna að vera saman svo áratugum skipti og nú hefur amma kvatt aðeins ári á eftir honum.

Minningin um ömmu á eftir að lifa lengi í hjörtum okkar allra.

Gerður, Fjóla og Svava.

Fengið af: http://www.mbl.is/mm/gagnasafn/grein.html?grein_id=778142