Nils Hansson Storlien -Hansemoen-Vangen

Nils Hansson vart kalla Hanse-Nils. Han var innom på Skomakarmoen omlag 1743.

   Nils var leige-soldat ei tid, men fann seg dårleg tilrette under kommando. Han rømde or tenesta og vart lyst fredlaus. Etter to år vart heimlengten så sterk at han reiste attende til Ål og baud seg til å smi for lensmannen. Tingstugu var no under arbeid, og byggmeister og lensmann Torkjell Villand bad Nils om smi eit gangejern for syne kva han dugde til. Lensmannen var så vel nøgd med arbeidet at Nils vart sett fri for å smi meir. (1553)1908/25 

   Ei segn går at Torkjell fekk presten til å skrive ut dødsattest på Nils slik at etterlysinga vart lagt bort. Eller: at Torkjell gøymde Nils i ei kiste då øvrigheita var etter han. 

   I 1764 lånte Nils 40 rd mot pant i 1 ku og 2 kviger samt smi-redskap (smiested, belg, slegge, to hamrar, to tenger, 1 skruvestikke og filer. Han arbeidde med jern, massing og tinn. Arbeida hans kan vera signerte med "N". 

   Nils køyrde av ein hesteskor på veg til marken i Kr.ania ein gong. Då reiste han opp til ei smie og lurte på om han kunne få laga seg noko hestsko-saum. Men smeden var annsam, så Nils sa at han kunne ordne det sjølv. Så fekk Nils ei jernstong og gjekk bort til essa. Då jernet var varmt, rende Nils til med hamar og meisel og smidde 6 saumar i sama 'hetun'. Smeden sette store auge og spurde: "Har de mange slike smeda der oppe i Ål?" 

   "Å ja, det e mange slike, sa Nils, eg er vel den dårlegaste!" Nils smidde for 1 dalar dagen, det var ei svær dagløn, men likevel svært lønsamt for oppdragsgjevaren. (Fortalt av Lars Bergo.) 

   Nils Hansson budde på nordre Vangen eller StoreVangen frå omlag 1769. Dette året lånte han 60 rd med pant i Vangen. 

   Nils og Ambjørg fekk utdelt såkorn i naudsåret 1774. (632) 

   I 1798 vart Nils klaga inn til forlikskommisjonen av Nils Strand og Knut Skottebøl. Nils hadde hogd ("bortryddet") skogen på Vangen for å ha tømmer til ei ny lu. Og dette vart istadenfor den gamle lua som dei hadde gjeve han. (1407) 23 

   I 1801 var Nils husmann med jord i sitt 86. år. Sonen Anders med kone og tre barn budde også på Rime. Anders var også smed.