Nils Sørensen Bårdsnes

Det var ikkje lite Nils måtte ta på seg for å få garden. Først var det sjølve kjøpesummen på 180 dalar. So kåret på 8 tynner havre, 1 tynne bygg, 4 tynner poteter, 2 kyr og 6 lam. Vidare skulle kårfolket ha ei halvt mål dyrka jord og fritt kårhus som Nils vart pålagt "aa opføre og bekoste". I tillegg til dette måtte Nils forsørgje søster si, Gjertrud, som var sjukleg. På 1860-talet var buskapen på garden 1 hest, 12 naut og 30 sau. Dei sådde 3/8 tynne bygg, 1 tynne blandkorn, 6 1/2 tynne havre og 4 3/4 tynne poteter. Av dette fekk dei ei avling på 4 tynner bygg, 7 tynner blandkorn, 39 1/2 tynne havre og 32 tynner poteter, kan Olav Rekdal fortelle i boka "Gards og slektshistorie for Vestnes", 1993.

Nils miste begge sønene sine, så det blei eldste dottera og mannen hennar (Ane Gurine som vart gift med Iver Knutson Raknes) som tok over garden.