Anders Olsson Myklestad

Anders overtok bruket på Myklestad med enkja Kristi. Han eigde elles odels- og kjøpegods i Hjartåker, med sagbruk.

Ekteparet var velstandsfolk. Anders hadde ei kastenot og han eigde ei jakt. Lekamen til fyrste kona vart sett ned under stolen i Uggdalskyrkja.

Anders kjende fødselsdagane til borna sine, som det går fram av skifta i 1693 og 1696. Som lensmann må han ha vore skrivefør og truleg hadde han dagane noterte.

Han var lensmann i Uggdal skipreide frå 1683 til 1688. Han var også mykje nytta som lagrettemann.

Anders stemnde i 1681 på mora sine vegner (Dordi) broren Hans på hans kone og versysters vegne for ein arv etter avlidne Ole Samuelson som skulle vera fanga i Sverige, seinare feide, og dø der. Anders meinte at arven etter Ole Samuelson og heimegifta hans burde vera utlagd på arvingane og la fram i retten skriftleg prov om at Ole var fanga og førd til Sverige, der han vart sjuk og døydde fire mil frå Stockholm og vart gravlagd i Dalen 20. august 1677. Skrivet vart dagsett 18. mai 1680. Vitne var fangane løytnant Johannes Tage, Nils Nilsson Hilde frå Tysnes og Kristian Ramme frå Etne. Det var den svenske kaptein Hunnerup som fanga Ole.