Elen Cathrine Hansdatter Giæver

Etnesoga IV p 70 Enge 2.

I Etnesoga bind II side 133 står det: Den 25. juni 1737 vart Tjerand Knutsson Flåte vigd til Marta Sakariasdotter Silda i Grindheim kyrkje. Fru Althandt var brurekone, og det var mange gjester, blant andre Samuel Larsson Håheim, Ola Torsson Gjerde, Gunnar Olsson Rugtveit, Ola Hansson Fossa og Lars Abelsson Sørheim. Etter bordseta tok Lars Sørheim fram fela, for han var spelemann i bryllaupet og folk ville dansa. Men prestekona bad han venta litt: "Lad oss læse for maden og gifve Gud sin del". "Kyss meg i rævo", svara Samuel Håheim. Ei stund etter kom han inn att i stova der fru Althandt sat og gav seg til å kasta fram grove skuldingar mot presten. "Kan du mindes, Samuel, for nogle år siden du måtte bøde 8 rdlr. for munden din?", sa prestekona. "Eg har 8, 10, 12 rdlr. å gje ut, eg", svara han. Prestekona sa: "Gudskjelov her er lov og rett til at skille oss ad". "Eg gjev lov og rett djevelen - " sette Samuel i, men så tok han seg i det att. Slikt var farleg å seia når lov og rett høyrde kongen til! "Gud velsigne kongen", sa han så. "Eg har tent kongen". Prestekona sat med hendene på bordet, og brått slo Samuel knytteneven i handa hennar så ho vart blå. Rett! "Då sagde præstekonen: Jeg kand ikke sige andet end du er meget høflig imod mig. Hvor på Samuel Håim helte sig nær eller tet til hendes ansigt hvorover præstekonen reiste sig op og vilde gåe. Da Samuel slog hende med hånden på axelen at dend blev blåe. Og i det samme falt benken, den som præstekonen sad på. Og hun gik ud." Av bryllaupsgjestene var det berre Ola Gjerde som hadde freista å stagga Samuel ved å seia til han: "Du snakkar deg bort". Men han hugsa svært lite att av samtalen då han skulle vitna, for han måtte tilstå at han hadde vore godt drukken då dette gjekk for seg. Rettssaka enda med at Samuel måtte ta attende alle skuldingar mot presten og betala bøter som visst gjekk monaleg over dei "8, 10, 12 rdlr." han hadde tenkt å ofra til føremålet.