Hallstein Ingebrigtsson på Ramstad

Fleire tidlegare granskarar har meint at sonen, den kjende Halstein Ingebrigtsen Ramstad, var innflyttar frå Barstad og at han var son til Ingebrigt Toresen av Follestad-ætta. Såleis skriv Hjørdis Nørve (1978) i «Ætta frå jernalder til atomalder» s. 41 beint fram at Halstein Ingebrigtsen flytte til Ramstad. Men han var altså fødd på Ramstad, og eventuelt ættesamband med Follestadætta eller Barstadætta må vere av eldre dato.

Gardssoga for Sykkylven, band 4, side 24. (1983)

Halstein Ingebrigtsen Ramstad f ca. 1540 d 1614 g Sigrid Guttormsd. Br ca. 1570-1614 Born: 1. Laurits, p br 2. N. N. g Amund Sjursen Ringstad, Stranda 3. Ingebrigt g p br

Halstein må ha vore ein av dei fremste mennene i bygda i si tid. Han var ein av utsendingane til kongehyllinga av Christian IV i 1591 (Aktstykker til norske stændermøders historie bd 1 s. 52). Han representerte Ramstad på ei markegangsforretning på Stranda mellom gardane Slyngstad, Langlo og Ringstad i 1595. Var lagrettemann. La odelsskatt av 4 mællag i 1603, 8 mællag i 1610. Brukte saga og skar 25 tylfter i 1603 og 50 tylfter i 1611. I 1606 var tienda hans 2½ mæler, som var ein god del meir enn det nest største skattytaren på Ramstad betalte då. I 1610 vart han saman med Erik Ramstad stemnd fordi han i fleire år ikkje hadde betalt leidang for ein liten øyde plass Fadstien. Dei måtte «for slig deris forseelse» bøte med 7½ rd. Halstein tok sitt eige liv. Då var han ein gammal mann. Av tingsvitne frå Spjelkavik 29/4 1614 ser vi at han var ein velhalden mann. Grannen Erik var mellom dei lagrettemennene som gjorde greie for buet hans saman med sorenskrivaren Anders Mortensen: Oluf Jonsen Abelset, Erik Guttormsen Ramstad, Oluf Endresen Tøsse, Christen Frantzen Lang-skibsholm og Størker Amundsen Lid. I tingsvitnet står det at Halstein «sig selff haffuer med en kniff mørdet og tagitt aff dage». Etter at all gjeld var betalt vart dette ført opp: 4 kyr 10 rd, 1 kvige 2 rd, 10 sauer med 3 lam 4 rd, 3 geiter, 1 halvvaksen bukk (l riisbid buch), ei halvvaksa geit, sengklede, 1 jarnhelle, 1 tinnfat. Jordegods: 1 Ringstad 2 mællag, i Furset 2 mællag, i Vartdal 2 mællag og i Sundalsfolden 4 mællag. Det sistnemnde lét arvingane kongen få for at dei skulle få lov å gravleggje Halstein utanfor kyrkjegarden.

Gardssoga for Sykkylven, band 4, side 24-25. (1983)

--------------------------------------------

Hallstein Ingebrigtsson Ramstad

"Tore Ingebrigtson Vartdal var truleg son til Ingebrigt Vartdal. Hallstein Ingebrigtson Ramstad var kanskje bror til Tore. Hallstein åtte 2 mellag i Vartdal og mellag i Sundalsfoll i Volda. Synnøve Ingebrigtsdotter, truleg gift med Ivar Myklebust i Ørsta, kan vera syster deira. Tore Ingebrigtson Vartdal var lagrettemann 1584. Saman med Knut Sætre (Vartdal) skreiv han under eit kjøpebrev 1584 på at Peder Jonson N. Vartdal fekk kjøpa 2 mellag i Vartdal av Olav Steinnes og Vigleik Vassbotn for 16 gl. dalar. Dette godset var odelsgods. Det er mykje truleg at alle desse som er nemnde her, var i slektskap med kvarandre, endå det er uråd å visa nærare korleis denne slektskapen hadde seg. Tore Ingebrigtson Vartdal var storbonde. Han bruka 12 mellag krongods i 1606 og la 1 1/2 dalar i tredjeårstake. Sameleis i 1609. Men i 1612 hadde han overlate 6 mellag til sonen Salmund (Samund), så han sjølv hadde att berre 6 mellag og la 3 ort i tredjetake. Dette Salmundnamnet kan peika på ein slektskap med den yngre Barstadætta i Barstadvik, der Salmundnamnet var brukt (jfr. Samundgarden i Barstadvik). Det er fortalt at Tore Ingebrigtson fleire gonger la landskyld til krona av 12 mellag jord. Han avla i gode år ca. 30 tynner korn og vel så det. Saman med Rasmus Kvien heldt han ute knekten Knut Jonson Myklebust i 1611."

Vartdalsoga I, s. 602 (1964)