Laurits Olaus Brodersen Sørsæter

På Sætra (Sørsætra) hadde dei geiter på beite i Hemne om somrane. Kanskje var det i fjella ved Stamnesset, der søsterdottera hans Laurits, ho Jensine Ågesdotter, budde fram til ho døydde i 1884. Ho vart gift der i 1873. Denne seine oktoberdagen i 1890 hadde han Laurits vore og henta heim geitene og geitosten. Han var snart heime. Frå Sætra såg dei seglet på båten hans ved Lyngøya, i retning mellom Klungervika og Utsetøya, når ein ser frå Sætra. Det bles friskt, men plutselig kom det eit vestavindsrokk, som gjorde at båten kollsegla. Han Laurits kom bort da. Dei fann han aldri, så han fekk ikkje noko grav. Matkista hans fann dei ved Leksa. Slik var det han Broder, sonen hans Laurits, fortalde denne historia til svigerdottera si, mi tante Sofie, som igjen fortalte historia til meg (Svein Bertil).