Margrethe Jakobsdtr. Birkeland Heimark

Margrethe kom frå Byrkjeland til Heimark i 1901 og var då 27 år gamal. Før ho vart gift var ho i teneste hos Sønneva Bøen på Storebø. Her fekk ho læra å sy manns- og guttekler, noko ho fekk god nytte av seinare i livet.

Ho var ei arbeidsam og snill kvinne som sjeldan sa nei når einkvan bad henne om ei teneste. Ho kunne sitja oppe halve natta og sy på kler til andre for dagane strakk ikkje alltid til. Betalinga var det ofte smått med.

Dei siste åra av livet budde Margrethe inne i eine stova i huset på garden. Ho var lite ute, og så godt som aldri utanfor tunet heime. Ho låg for det meste i senga si med ein bibel på nattbordet. Den heilt siste tida budde ho på aldersheimen på Storebø.

Margrethe døydde av slag 89 år gamal den 9. april 1963.