Ola Hansen Leirnes

Ola bygsla Leirnes i Høyanger i 1655, og ætta sit på garden enno. Han var nok nett gift då, med Ingeborg. Den andre kona heitte Magdeli og må vera frå ei anna bygd, då det er eit uvanleg namn i Kyrkjebø.

Ola er nemnd i manntalet i 1645, men ikkje i skiftet etter faren same året, han var nemleg fødd "uekte" og hadde ikkje arverett.

I 1661 høyrde det "ingen herlighed" til garden, medan matrikkelen i 1666-1667 seier det er "brendeved og ringe tømmerskoug". Matrikkelen i 1667 fortel elles at landskylda er 1/2 laup smør, at dei sår 1 1/2 tønner havre og avlar seks tønner og føder sju naut. I tiend betalar dei 2 mæler korn, i 1675 er det 1 mæle korn. Avlinga då må berre ha vore tre tønner.

Ola var lagrettemann på mange ting saman med broren og syskenbarnet sitt på Osland. Det måtte vera skyldskap som gjorde at bøndene på små øydegardar vart nytta som lagrettemenn, elles var det berre bøndene frå dei største gardane som vart tekne til det.

Han betalte skatt i 1666-1667, men i 1679 er det enkja Magdeli som er brukar. Ho gifte seg seinare med Lasse Fuglsbø. Det var skifte etter henne i 1709. Arven var 50 riksdalar, og berre ein av sønene levde då.