Gimmestad "er ein sentral og stor gard på Sørstranda, med mange historiske kjelder frå ei særmerkt og interessant fjern fortid. Garden har gjeve namn både til sokn og kyrkje, ettersom gamlekyrkja står her. I verdsleg samanheng har garden gjeve namn til skipreida. (...) Både O. Rygh og yngre stadnamngranskarar held på at namnet kjem av det gamalnorske mannsnamnet 'Gemlir', som er avleidd av adjektivet 'gamall'. Endelekken kjem sjølvsagt av 'stadir' som tyder bustad, gard. Mannsnamnet 'Gamle' er brukt i Nordfjord så seint som ikring 1650. (...) Garden har funn frå 400-talet, 500-talet og folkevandringstid. Dette tyder på at garden var rydda i eldre jarnalder".
Kjelde: Soga om Gloppen og Breim, bind III, s.79
Kjende tidlegare skrivemåtar av gardsnamnet er: "Gemlisstodum" og "Gæmlastadhom" (1300-talet)..
Garden Gimmestad var i 1410 erkebiskop Aslak Bolt sin eigedom. Etter nokre overdragingar var Munkeliv-klosteret i Bergen eigar av Gimmestad, deretter kom garden over på Losnaætta sine hender. Erlend Filippusson av Losnaætta gav Gimmestad vidare til erkebispestolen i Nidaros, som var eigar fram til reformasjonen. Etter reformasjonen overtok Rosenkrantz-ætta Gimmestad. Seinare eigarar var borgarmeister Rasmus Lauritsson, sokneprest Jens Hansson Schreuder, dottera Anne Jensdotter Schreuder (førebokstavane hennar er inngraverte i brurestolen i Gamle Gimmestad kyrkje), og hennar born J.R. Finde og Jartru Marie Cortiin. Ikkje før i 1740-50-åra fekk brukarane løyst ut garden og vart sjølveigande bønder.
På Gimmestad er det frå gammalt 8 bruk, i dag 11. Utskifting fann stad i 1910.
Namn på bruka:
- Anders (bruk nr.1)
- Kristen (bruk nr.2)
- Rasmus (bruk nr.3)
- Mattis (bruk nr.4)
- Sørn (bruk nr.5)
- Sivert (bruk nr.6)
- Nils (bruk nr.7)
- Arne (bruk nr.8)
- Ester (bruk nr.9)
- Synneve (bruk nr. 10)
- Myra (bruk nr.11)
Sørn, Sivert og Myra vart utskilde frå andre bruk og matrikulerte i tidsrommet 1875 - 1926. Det har frå gammalt vore vanleg i Gloppen å gje bruka personnamn. Dagens namn stammar nok frå 1700-talet / tidleg 1800-tal. Legg merke til at to av bruka har kvinnenamn. Dette er særmerkt for Gimmestad.