Søren Jensson Godtzen

• Klepp Gards- og ættesoga gjenom 400 år, 1519-1900, Sørbø, side 273, nr. 7

Klepp Gards- og ættesoga gjenom 400 år, 1519-1900, Sørbø, side 273, nr. 7
Søren Jensson Godsen, brorson åt nr. 6, son åt sokneprest i Stavanger, Jens Sørenson Godsen, f. 20/8 1665, d. 7/9 1734,
G. 11/2 1691 m. Engel Arentz, f. 2/8 1666, d. 1724.
Born:

• a. Anna Margrete, f. 18/4 1695, g. m. Peder Andersson Scheen, sokneprest i Avaldsnes.
• b. Elisabet, f. 27/7 1697, g. m. Gabriel Schanke, sokneprest i Lye.
• c. Huldeborg, f. 22/7 1700, g. m. Jørgen Henrik Abel, kapellan i Klepp, seinare sokneprest i Bygland.

Søren vart ordinert til prest i Klepp 1690, og var det til 1734.
1701 er han førd som brukar av heile Sørbø. Han var ein mann som hadde forstand på å samla seg gods, og i matrikkelen 1723 er han eigar av:
Heile Pollestad, 24 sp., heile Hole, 12 sp., 1/3 av n. Braut 24 sp., 4/5 av n. Horpestad 24 sp., 2/3 av Nese 27 1/2 sp.
Det er fleire sagn om prosten Søren Godsen, m. a. at han gjekk att og viste seg på prestegarden fleire gonger etter han var gravlagd. Etter skrifter etter presten Knudsen, sjå seinare, som hadde det frå ein pålitande gamal mann i bygda skulle Godsen vore ein stor, før mann og han var oppi mange saker.
Ein gong berga han ein manndraper som var frå n. Åse og i eit vertskap på n. Horpestad hadde drepe grannen sin med kniv og rømde til Sverike. Godsen fekk taka opp saka hans att og fekk det så til at mannen fekk lov å koma heim att. Så gjekk presten til kona hans med dette bodet og då sa han: <<Nå mor, må det ikkje meir vera småklumpar med smør; men store dallar.>> Same mannen hadde og fortalt at Godsen hadde hjelpt lensmannen, Rasmus Kleppe, som var dømt til slaveriet, men der tok han nok imiss for denne saka var ikkje oppe før 1739 og då var Godsen død for 5 år sidan.
I hans tid var det og at me høyrer om strid mellom konene som trettast om kven som skulle sitja øvst i kyrkja og laga slik ståk at presten måtte tala dei tilrettes frå preikestolen, og det gjekk så vidt at presten måtte skriva til bispen som gjorde av at dei yngre skulle vika for dei eldre endå om den yngre var gift med ein medhjelpar, og at Malena Stangeland ingen rett hadde til å sitja framfor Eli Stangeland som var eldre gift.

Sogneprest til Klepp på Jæren, Rogaland 1690-1734.