Marthinus Phillippus Cornelis Phillipus Cornelis Ferreira, b7c1d8

Onder die Voortrekkers was daar skynbaar slegs een Ferreira, naamlik Marthinus Stephanus Ferreira (gebore 1810), kleinseun van Ignatius Wilhelm Ferreira (c.1751-c.1781) en vader van die latere generaal Joachim Johannes Ferreira (1835-1917). Marthinus Ferreira het op 16 Desember 1838 aan die slag by Bloedrivier deelgeneem. Marthinus Philippus Cornelis Ferreira (1811-1875), seun van Ignatius Marthinus Ferreira en Margaretha Maria Charlotta Schutte, het in 1839 in Natal aangekom en hom as algemene en ontskepingsagent in Port Natal in die Republiek Natalia gevestig. Hy was in 1840 die tydelike landdros en vanaf 1841 heemraad van Port Natal. Vanaf 1843 was hy heemraad vir die distrik Weenen. In 1847 was hy medeverantwoordelik vir die opstel van die eerste munisipale regulasies vir Pietermaritzburg en was in 1856 burgemeester en later ook stadstesourier van dié stad. Hy was spoedig 'n vooraanstaande sakeman en vendusieafslaer en stigter van die Natalse Bank in Pietermaritzburg. As lid van die Natalse Naturellekommissie van 1852 het hy die opheffing van die lokasiestelsel en die verskuiwing van Natalse swartes na die suidelike deel van die kolonie voorgestel, maar aan dié voorstel is nie uitvoering gegee nie. As ouderling van die Ned. Geref. Gemeente Pietermaritzburg het hy in 1859 dié kerk in die Durban Evangelie Alliance verteenwoordig.