Susanna Catharina Swanepoel

• Family Search : Susanna Catharina Swanepoel (Nee) Rabie Added by AR Swanepoel
• Wiki Tree : Susanna Catharina Swanepoel (Nee) Rabie Added by AR Swanepoel

Notas deur David Abraham Swanepoel, direkte nasaat van 8 geslagte

Daar is ‘n interesante familieverband rondom hierdie persoon. Margaretha Pyl (Rabie) was na die dood van haar man Christiaan vlugtig getroud met Jan Swanepoel, b2. Op hierdie wyse het haar dogter Susanna Catharina dus Jacobus Swanepoel (b6) ontmoet. “Op 13 Oktober 1748 word die 23-jarige Jacobus Swanepoel (b6) op Tulbagh deur ds Arnoldus Meiring in die huwelik bevestig met Susanna Catharina Rabie (b2), die dogter van Christiaan Rabie en Margaretha Pyl (NGKA: G 4/ 9/ 2: 2). Susanna Catharina was die tweede oudste kind en een van twee dogters en twee seuns van Christiaan Rabie en Margaretha Pyl [1]. Die teks hiervandaan steun sterk op bron [1].

Uit die huwelik tussen Jacobus Swanepoel en Susanna Catharina Rabie is daar ses kinders gebore, vier seuns en twee dogters. Die oudste twee, Margarietha en Pieter, was reeds gebore toe Jacobus Swanepoel in 1751 uit die distrik Drakenstein na die Swellendam-distrik verhuis (KAB: J 195- J 197).

In Jacobus Swanepoel en Susanna Catharina Rabie se geval, was die naaste kerk op Tulbagh gelee, 'n afstand van ongeveer 135 kilometer op vandag se gebaande weg. Uit die doopregisters van die Kaapse gemeente blyk dit dat die veeboere ook die Kaapse gemeente besoek het wanneer hulle een maal per jaar daarheen moes gaan om die ordonnansie op hulle leningsplase te hernu. Vyf van Jacobus Swanepoel en Susanna Catharina Rabie se kinders is op Tulbagh gedoop, terwyl een in die Paarl gedoop is (NGKA: G 4/7/1: 14, 19, 25, 35, 53; NGKA: G 3/ 3/ 2: 17).

Sy sterf kort voor 21 Februarie 1764 op ongeveer 36-jarige ouderdom. Hoewel die oorsaak van haar dood nie aangedui word nie, is haar jongste kind, Jan (b6c6), in 1761 gebore en die moontlikheid is groot dat sy as gevolg van komplikasies met 'n volgende swangerskap gesterf het. Die datum word verkry uit 'n boedel-inventaris wat na haar afsterwe opgestel is. Daar was daar 'n opstal ter waarde van Rds 50 op die plaas Poespasvallei waar hulle in daardie stadium gewoon het. Die feit dat hulle slavin Rebecca en haar twee kinders, Adam en Eva, in dieselfde inventaris op Rds 250 gewaardeer word, dien as bevestiging dat die veeboere nie veel geld aan die woonhuise op hulle leenplase spandeer het nie (KAB: MOOC 6/9/108: 1301). Die volledige inventaris gee 'n goeie aanduiding van die karige besittings van 'n veeboer-gesin teen die middel van die agtiende eeu. Die inventaris is te vind op p 71 van [1] .

Die opstel van hierdie boedel-inventaris na die afsterwe van Susanna Catharina Rabie en die afwesigheid van 'n testament, is 'n aanduiding dat sy intestaat gesterf het.

Die karigheid van Jacobus Swanepoel en Susanna Catharina Rabie se huisraad bied ook 'n eerstehandse blik op die eenvoudige bestaan wat 'n veeboer en sy gesin teen die middel van die agtiende eeu gevoer het. Hoewel hulle oor twee tafels beskik, het hulle slegs twee stoele. Daarby is daar vir die gesin van agt slegs twee beddens en twee katels (KAB: MOOC 6/9/108, 1301).

Bron:

Swanepoel, Christiaan Hendrik. 2003. 'n Tak van die Swanepoel-familie in Suid-Afrika, 1699 tot 1999: 'n genealogiese en kultuurhistoriese studie. MA tesis, Universiteit van Stellenbosch. Gratis aflaaibaar by: http://scholar.sun.ac.za/handle/10019.1/53526 .

Kopiereg: Universiteit van Stellenbosch, synde hierdie nota hoofsaaklik ‘n herverpakking is van uittreksels uit die tesis.

Kwytskelding: geen verantwoordelikheid word aanvaar vir enige foutiewe of onakkurate inligting nie, hetsy aangehaal, herverpak of self geskryf.